Mun sennilega deyja.

Það er ekki ólíklegt að hreistur hafi skrapast af svona nýgengnum fiski og þá kemur strax sveppur í sárið og fiskurinn dregst upp og drepst hægum og kvalafullum dauða.  Legnir fiskar þola vel svona meðferð en bara að sporðtaka svona nýgengna fiska orsakar hreisturlos með fyrrgreindum afleiðingum.

Fyrsti laxinn úr Norðurá

Athugasemdir

[Guðmundur Steinbach (IP-tala skráð) 5.6.2008 kl. 12:49]

Verst fyrir þig að reynsla og rannsóknir sýna að laxar lifa góðu lífi eftir að þeim er sleppt ef allt er gert rétt. Annars værum við að týna upp fleiri hundruð laxa á sumri en það er bara ekki raunin.

[Stefán Páll (IP-tala skráð) 5.6.2008 kl. 14:47]

Tek undir með Mumma hér að ofan, þetta fer að verða ansi þreytt mýta að nýgenginn lax þoli enga meðhöndlun.

Staðreyndin er sú að ef menn fara rétt að, meðhöndla laxinn eins lítið og kostur er og fara um hann mjúkum höndum, þá eru allar líkur á að laxinum verði ekki meint af þessu.

[Þórir Kjartansson, 5.6.2008 kl. 17:37]

Það er rétt að þið vitið Guðmundur og Stefán að undirritaður hefur stundað bæði stangaveiði og fiskeldi í nokkra áratugi og veit því meira um þetta en margir aðrir. Eins og ég sagði í innlegginu þola legnir fiskar þetta vel en ekki dettur mér í hug að halda að alltaf sé farið mjúkum höndum um þessa nýgengnu fiska. Það er ekki rétt athugað að þessir fiskar ættu að finnist reknir upp úr ánum. Þegar sveppurinn ágerist verða fiskarnir máttlausir og að síðustu hörfa þeir hálf dauðir undan straumi og út í sjó. En þá er í flestum tilfellum orðið of seint að sjávarseltan drepi sveppinn og bjargi þeim.  Hvenær finna menn líka allar þær þúsundir laxa, sem drepast eftir hrygningu?  Af öllum þeim fjölda finnast bara örfáir reknir.

[Guðmundur Steinbach (IP-tala skráð) 5.6.2008 kl. 22:18]

Það er rétt að þú vitir Þórir að ég hef verið leiðsögumaður síðan 1999 og því séð ýmislegt.

Fyrir það fyrsta, er ekki betra að láta náttúruna njóta vafans sem menn vilja meina að sé til staðar?
Í öðru lagi,  í sambandi við hrygningarfisk, sem deyr aðallega vegna frosts og ísmyndunar, en ekki vegna þess að hann þolir ekki meira, þá eru augljósar ástæður fyrir því að það finnst ekki meira af honum sbr. þeim fjölda laxa sem sást í Laxá í Kjós í vor, hann lifir einfaldlega af.
Í þriðja lagi, þá er það rétt hjá þér að legnir fiskar þola meira en nýgengnir fiskar en það er af og frá að allir nýgengnir fiskar deyi þó svo að nýgengnir fiskar þurfi meiri aðgát en legnir fiskar.

[Haraldur Eiríksson, 6.6.2008 kl. 09:09]

Komdu sæll Þórir

Nú er ég hræddur um að eitthvað hafir þú farið út af sporinu. Samkvæmt tölum frá Landssambandi Stangaveiðifélaga, sem byggðar eru á upplýsingum frá Veiðimálastofnun lifa um 97% laxa sem sleppt er af veiðimönnum. Þar sem þú kýst að gera lítið úr þessum verndunaraðgerðum í Norðurá skal bent á það að fyrir tveimur árum þegar að þessi háttur var tekinn upp þá tóku veiðimenn sig til og merktu nokkra fiska áður en þeim var sleppt fyrstu daga tímabilsins. Megnið af þeim fiskum veiddist aftur á sama stað eða ofar í ánni. Ekki voru þeir óhressari en það að þeir kusu að taka agn í annað sinn! Við Laxá í Kjós og Vatnsdalsá er þetta einnig þekkt, og þar veiðast merktir laxar jafnvel í þriðja eða fjórða sinn sama sumarið?

Það er leiðinlegt þegar að menn gefa sig út fyrir að hafa vit á hlutunum bera svona vitleysu á borð fyrir almenning. Ef þetta er kunnátta manna sem stunda fiskeldi hérlendis þá er ekki nema von að laxeldi gangi illa við íslandsstrendur.

Með kveðju

Haraldur Eiríksson

[Þórir Kjartansson, 6.6.2008 kl. 23:35]

Einhver sagði mér að umræddum fiski hafi svo verið sleppt með fluguna í kokinu.  Þessi veiða/sleppa aðferð er auðvitað bara hrein ónáttúra.